Како да создадете навика за читање?
Ако веќе некое време си го давате изговорот „немам време за книга,“ веројатно треба да ги промените секојдневните навики.
Кога имате силна желба, но немате време во денот, овие совети нека ви послужат како водич да изградите здрава навика за почесто читање:
- Имате време за читање, само тоа не ви е приоритет. Прифатете дека сосема е во ред да не сакате да читате. Сега, оваа недела или овој месец – во ред е. Ако ви се прави нешто друго, светот нема да пропадне. Само бидете искрени.
- Откажете се од идејата дека читањето е нешто што мора да се прави на долги временски интервали. Ако и вие сте од оние луѓе кои велат „ако почнам, нема да можам да ја оставам книгата, па затоа не почнувам“ еве едно прашање за размислување: Што има повозбудливо од исчекувањето? Додека ги вртите палачинките за вечера – прочитајте 3 страни. Едно вртење – пола прочитана страница.
- Оставете го телефонот во другата соба. Светот нема да пропадне ако не се јавите половина час. Многу подобро ќе се задлабочите во приказната и ќе ги памтите случувањата, ако престанете да ги гледате нотификациите.
- Не мора да читате секој ден, ако не сакате. Секако секојдневно читате по нешто – постови, вести, огласи, пораки…
- Не треба да се врзувате временски со читањето. Понекогаш може да читате со утринското кафе, а понекогаш и пред спиење. Дисциплината е супер, но додека ви претставува задоволство.
- Барајте многу препораки за книги. И не мора да ја почнете секоја книга која ќе ви ја препорачаат. Читајте го само она што ви звучи интересно.
- Не се споредувајте со другите – ниту треба да ве лути што некој има време да прочита 100+ книги годишно, ниту пак да напаѓате некој кој има желба да прочита само 4 наслови во годината.
Почни ја годината со добро психичко и физичко здравје
На почетокот на секоја година правиме листи како ќе се храниме поздраво, ќе вежбаме почесто, ќе пиеме барем 1 литар вода дневно, ќе внимаваме на благото и алкохолот… И сето тоа би било супер, да не трае само во првите денови од јануари.
Прирачникот за добро психичко и физичко здравје може да го читате во текот на целата година и да ви биде водич на еден здрав почеток.
„ Добро едуцираниот пациент постојано работи на подигнување на своето здравје и разбира дека најголем дел од болестите се одраз на несоодветна исхрана, хигиена, животен стил…“ е само мал дел од прирачникот со генијален наслов – 50 здравствени совети за првите 100 години од животот.
Па, да бидеме здрави барем првите 100 години
Во оваа книга ќе најдете разни факти поврзани со здравјето кои ќе ви помогнат да бидете поодговорни кон сопственото, но и здравјето на луѓето околу вас.
Како што вели авторот: „Добро едуцираниот пациент е бенефит за сите: го штеди своето време, своето здравје и целиот здравствен систем…“
